Rreth 340 mijë euro është vlera e dëmeve nga vërshimet në Junik
-
28/01/2023 | 10:05
Kryetari i Junikut, Ruzhdi Shehu tha se vlera e dëmeve nga vërshimet në këtë komunë është rreth 340 mijë euro.
Shehu për tëvë1 ka thënë se dëmet janë kryesisht në infrastrukturë rrugore, në shtratin e lumit Erenik dhe në ekonomitë familjare.
“Nga këto vërshime kemi pasur dëmtime që vlera e përgjithshme që mund të them për herë të parë publikisht është rreth 340 mijë euro dëme që janë shkaktuar nga vërshimet. Kryesisht janë në infrastrukturë rrugore, në shtratin e lumit Erenik dhe në ekonomi familjare”, ka deklaruar ai.
Shehu thotë se ende nuk kanë marrë ndonjë konfirmim për ndihmë nga Qeveria.
“Vlerësimi i dëmeve është bërë nga ekspertë e fushave, deri më tani i kemi dorëzuar të gjitha kërkesat te Qeveria dhe jemi në pritje, mirëpo deri më tani nuk kemi ndonjë konfirmim. Qeveria është e vonuar sepse ka nevojë emergjente të intervenohet”, përfundoi Shehu.
