Salihut i ‘dhimbset’ Hoti: Vështirë e ka – i rrethuar me Gërvallen, Muratin, Kusarin e Haxhiun

Deputetja e PDK Arbnora Salihu në komision ka kritikuar kabinetin qeveritar ku ironizoi me ministrin për Punë, Familje dhe Vlerat e Luftës Çlirimtare, Andin Hoti, të cilin e thumboi se shërben për të shpëlarë qëndrime kundër UÇK-së në Vetëvendosje, shkruan Gazeta Metro.

Sipas saj, ministri përballet me presion dhe vështirësi për shkak të deklaratave të disa zyrtarëve qeveritarë, të cilat, siç tha, bien ndesh me vlerat e luftës çlirimtare.

Në këtë kontekst, ajo përmendi disa emra nga ekzekutivi aktual që njihen me deklaratat e tyre kundër UÇK-së, rasti i Donika Gërvalla – Schwarz e cila e kishte quajtur ish-kryekuvendarin KadriVeseli “koka e krimit” dhe Hekuran Murati që njihet me artikullin e përbashkët anti-UÇK.

“Ministri e ka të vështirë se është i rrethuar nga Donika Gërvalla… gjithashtu nga Hekuran Murati, që ka deklaruar publikisht se lufta në Kosovë do t’i kushtonte më lirë buxhetit nëse do të paguheshin mercenarë,” tha Salihu.

Pas këtyre deklaratave pati përplasje në komision, ku kryetarja Fatmire Mulhaxha-Kollçaku kërkoi ndërprerjen e kësaj forme diskutimi. “Këtu kisha lutë ndërprerjen me apostrofimin e ministrave me rend… Jo kështu, nuk o korrekt.” Ndërsa ministri Andin Hoti deklaroi se reagimet e tij kanë nxitur veprime nga institucionet përkatëse./gazetametro.net