Loading…

SBASHK’u me protestë kundër mbylljes së shkollave në Kamenicë

  • 15/09/2019 | 16:14

SBASHK’u me protestë kundër mbylljes së shkollave në Kamenicë

Sindikata e Bashkuar e Arsimit, Shkencës dhe Kulturës e Kosovës, ka njoftuar se të hënën do të organizohet protestë para Kuvendit Komunal të Kamenicës, për të kundërshtuar mbylljen e shkollave në këtë komunë, shkruan Gazeta Metro.


Nëpëmjet një reagimi nga SBASHK, thuhet se kjo protestë ka për qëllim hapjen e shkollave në Kamenicë, ndonëse kryetari i komunës, Qëndron Kastrati, i trimëruar nga heshtja e MASHT’it, sipas tyre, vazhdon të sillet në stilin e sulltanit.

“Kjo fillon që nga nesër kur në Kamenicë do të niset me veprime sindikale, pra me protesta duke filluar nga ora 12: 30 minuta para ndërtesës se Kuvendit Komunal të Kamenicës. Pjesë e kësaj proteste në do të jetë edhe kryetari i BSPK-së, Avni Ajdini me stafin qendror dhe kryetari i SBASHK-ut, Rrahman Jasharaj dhe stafi nga qendra. U përball me kundërshtime nga prindërit, mësimdhënësit e nxënësit gjatë gjithë verës. Iu bë me dije publikisht qëndrimi i SBASHK-ut kundër mbylljes së shkollave në Kamenicë, por Qëndron Kastrati i trimëruar nga heshtja e MASHT-it, që është e nënkuptueshme sepse Shyqiri Bytyqi kurrë nuk ishte ministër e aq më pak tani kur aderoi në partinë e Qëndronit, i trimëruar edhe nga shkrimet në stilin e tregimeve humoristike të Bexhet Shalës në emër të KMLDNJ-së, që merr thua në mua dhe tani më nxjerr si njeriun e dytë në botë, pas Trampit, vazhdon të sillet Qëndroni në stilin e sulltanit d he krijon lista për tepricat teknologjike, nuk ua jep tekstet shkollore nxënësve, tekste këto të botuara nga buxheti i shtetit, kërcënon me suspendime nga puna dhe krekoset se kryetarët tjerë në komunat e Kosovës nuk paskanë guxuar të bëjnë mbyllje shkollash e përjashtime masive nga puna të punëtorëve të arsimit, që kanë vite të tëra përvojë në arsim. Qëndroni mundohet edhe të krijojë situata të dhunës e përplasjeve mes mësimdhënësve duke iu ofruar gënjeshtra se do t’i sistemojë disa nëse e përkrahin e do t’i ndëshkojë të padëgjueshmit”, thuhet në reagimin e kësaj sindikate.

SBASHK thotë se ka pritur dialog dhe mirëkuptim për zgjidhjen e drejtë të kësaj gjendje të rëndë, mirëpo edhe pse nuk e kanë arritur, kjo sindikatë nuk do të heshtë.

“Zhvilluam takime me Qëndronin, e ngritem çështjen edhe në MASHT duke kërkuar qëndrimin e tyre si institucioni më i lartë i arsimit dhe themelues i institucioneve arsimore, vizituam edhe shkollat e dënuara me mbyllje nga Qëndroni, kërkuam nga anëtarësia maturi. Kërkuam nga prindërit angazhim, që çështja të zgjidhet si duhet dhe që me dialog të arrihet marrëveshje që Kastrati ta tërheq vendimin ,bile për këtë vit, dhe çështja në ngritet pas krijimit të institucioneve qendrore pas votës së lirë më 6 tetor dhe le të veprohet njëjtë nën tërë Kosovën, por me një Strategji të peshuar mirë. Kastrati mbështetur nga shkrimtari i dobët i tregimeve humoristike e satirike Bexhet Shala dhe nga heshtja e MASHT-it po ndjehet fitues, por e ka gabim. Pritja e SBASHK-ut ka kufi dhe tani Kastrati do të përballet me veprimet unike të sindikatës sonë sepse punëtorët e arsimit në Kamenicë janë pjesë e SBASHK-ut e SBASHK është pjesë e përkrahur fuqishëm e Unionit të Sindikatave të Arsimit të Evropës më 11 milionë anëtarë dhe e Inernacionales Botërore të Arsimit më 31 milionë anëtarë. E Shpend Ahmeti le të mos pranojë edhe në të ardhmen takimin me ne se kërkuam këtë tani e dy javë. E Shyqiri Bytyqi dhe të vazhdojë me heshtjen apo më përkrahjen e mbylljes së shkollave dhe me dënimin që fëmijët të udhëtojnë me dhjetëra kilometra në ditë për të plotësuar egon e sëmurë të Qëndronit, që tani e ka në parti. Le të heshtin edhe liderët në fushatën e nisuar herët zgjedhore, por SBASHK-u nuk do të hesht”, thuhet në reagim.

Sipas SBASHK, në Kamenicë nuk po respektohen ligjet as institucionet qendrore e as zëri i prindërve, nxënësve e mësuesve dhe për këtë duhet të ketë një zgjidhje. /gazetametro.net

Më të fundit
Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë