Serbia deponon në ITU letrën për kodin telefonik të Kosovës

Është hequr barriera që, prej dy vjetësh, e ka mbajtur peng pajisjen e Kosovës me kodin telefonik 383.

Serbia e ka deponuar letërpajtimin në Unionin Ndërkombëtar të Telekomunikacionit (ITU).

Edita Tahiri, ministre e Dialogut, i ka thënë të hënën “Kohës Ditore” se Prishtina zyrtare e ka marrë kumtin për këtë.

“Më datën 3 dhjetor kemi marrë konfirmimin nga Bashkimi Evropian që Serbia e ka dorëzuar letrën në ITU, sipas marrëveshjes së Brukselit për telekomin”, ka thënë ministrja Tahiri. “Në letër thuhet që Serbia shpreh pajtimin që ITU-ja t’ia ndajë Kosovës kodin telefonik 383”.

Nëpërmjet një marrëveshjeje të 2013-s, parashihej që nga janari i 2015-s do të mundë të përdorej nga operatorët vetëm kodi i cili do t’i ndahej Kosovës nga ITU-ja. Kodi nuk ishte ndarë.