Serbia do të jetë antare e BE’së para Kosovës

Nënkryetari i SPS-it, Branko Ruzhiq, i tha Die Presse të Austrisë se Serbia nuk është e detyruar ta njohë pavarësinë e Kosovës. Megjithatë, Serbia do të bëhet anëtare me të drejta të plota në BE duke “lënë jashtë territorin e Kosovës”, transmeton Koha.net.

“Nëse anëtaret e BE-së, siç janë Sllovakia ose Spanja nuk e njohin pavarësinë e Kosovës, nuk jemi të detyruar as ne kur të aderojmë. Serbia do të bëhet anëtare e BE-së duke përjashtuar territorin e Kosovës”,ka thënë ai.

Ai ka shtuar se kjo nuk do të ndodhë shpejt.

“Deri atëherë kemi mjaft kohë të gjejmë zgjidhje funksionale për këtë çështje. Ne, politikanët nga Serbia dhe nga Kosova duhet të kemi qasje pragmatike dhe nuk guxojmë të mendojmë në mite”, ka sqaruar ai.

Duke theksuar se negociatat po shkojnë mirë, Ruzhiq ka thënë se ndodhen në një situatë specifike.

“Ndodhemi në një situatë specifike, meqë procesi është i ndërlidhur me bashkëpunimin e Beogradit me Prishtinën. Nga ana tjetër kemi marrëdhënie të mira me Rusinë e Kinën, prandaj duhet të harmonizojmë politikën e jashtme me BE-në”, ka thënë Ruzhiq.