‘Sermaxhaj e la klubin në gjendje të rëndë’, drejtori i Malishevës tregon nëse kanë arritur marrëveshje me Sokolin
-
18/01/2023 | 13:57
Drejtori i KF Malishevës, Kastriot Kafexholli e ka konfirmuar për Gazeta Metro se klubi e ka finalizuar marrëveshjen me trajnerin, Bylbyl Sokoli. Ai gjithashtu ka folur edhe për largimin e Sami Sermaxhajt.
Kafexholli ka deklaruar se shpreson që kanë bërë një zgjedhje të mirë me emërimin e Sokolit në postin e shefit të shtabit teknik.
Ai gjithashtu potencoi se Sermaxhaj e ka lënë klubin në një ”gjendje shumë të rëndë”, pasi që është larguar gjatë fazës përgatitore.
”Po e kemi finalizuar marrëveshjen me Bylbyl Sokolin. Trajneri Sami Sermaxhaj e ka lënë klubin në fazën përgatitore në Onix dhe tre ditë para se të nisemi në fazën e dytë përgatitore në Turqi në një gjendje shumë të rëndë.”
”Megjithatë, klubi shpreson se ka bërë zgjedhjen e mirë me emërimin e Bylbyl Sokolit si trajner dhe me organizimit e mëtutjeshme. Gjatë ditëve në vijim pritet të emërohen edhe ndihmësit e tij,” tha ai për Gazeta Metro.
I njohur ndryshe edhe si ‘Profa’, Bylbyl Sokoli është një nga trajnerët më me përvojë në futbollin kosovar ku ka drejtuar skuadra si Gjilani, Prishtina, Ferizaj, Llapi dhe Hysi.
Ndërkohë, 64-vjeçari ka qenë shef i shtabit teknik edhe te Renova dhe Milano Kumanovo. /gazetametro.net
