Suspendohen 4 zyrtarë për rastin Dehari

Ministrja e Drejtësisë, Dhurata Hoxha ka suspenduar nga detyra ushtruesin e detyrës së Drejtorit të Shërbimit Korrektues, Sokol Zogaj, një zyrtar korrektues dhe dy mbikqyrës.

“Inspektorati i Ministrisë së Drejtësisë, gjatë zbatimit të procedurës së inspektimit, në pajtim me detyrat dhe obligimet e veta ligjore, ka dërguar raportin e Inspektimit të procedurave te ndjekura me rastin e vdekjes së të burgosurit Astrit Dehari”, lajmëron ministria.

Inspektorati, sipas komunikatës, gjatë inspektimit nuk ka gjetur asnjë veprim të institucionit, i cili në çfarëdo mënyre do të ishte nxitës apo shkaktar i vdekjes së Astrit Deharit edhe pse janë identifikuar disa neglizhenca procedurale.

“Si pasojë e këtyre neglizhencave janë iniciuar procedurat disiplinore ndaj një zyrtari korrektues, dy mbikëqyrësve si dhe ushtruesit të detyrës së Drejtorit, të cilit po ashtu i është shqiptuar edhe masa e suspendimit si masë paraprake”, thuhet në komunikatën e ministrisë. /gazetametro.net