Tahiri: Procedura për zgjedhje të reja vetëm ka nisur, gjithçka pjesë e strategjisë së VV’së

Nënkryetari i parë i AAK-së dhe drejtuesi i Grupit Parlamentar të kësaj partie, Besnik Tahiri, ka vlerësuar se zhvillimet e fundit politike po e çojnë vendin drejt një tjetër procesi zgjedhor, përcjell Gazeta Metro.

Duke folur në T7, Tahiri pretendoi se situata e krijuar nuk është e rastësishme, por pjesë e një skenari politik të Lëvizjes Vetëvendosje. Sipas tij, kjo do të mund ta shtynte opozitën që çështjen ta adresojë në Gjykatën Kushtetuese.

Tahiri tha se, në një rast të tillë, Gjykata Kushtetuese do të duhej të mbështetej në qëndrimet që tashmë i ka dhënë për çështjen.

“Sepse procedura e dërgimit të Kosovës edhe një herë në zgjedhje vetëm ka nisë. Kushtetuta nuk është e faktuar. Jo, pra gjithçka që ndodh është një nën një strategji e lartë e Lëvizjes Vetëvendosje që opozita me e dërguar rastin në Gjykatë Kushtetuese dhe Gjykata Kushtetuese me marrë një vendim… Gjykata Kushtetuese nuk mundet me dalë prej këtij interpretimi”, deklaroi Tahiri.

Ai kërkoi që institucionet e drejtësisë dhe mekanizmat përgjegjës për sundimin e ligjit ta shqyrtojnë situatën, duke e konsideruar atë si çështje me peshë kushtetuese.

“Po, se në mënyrë normale këtu kish pasë dashur krejt aparati i sundimit të ligjit me filluar me e trajtuar se këtu ka shkelje të mëdha kushtetuese, i cili është fjala e parë në betimin e një deputeti”, theksoi Tahiri./gazetametro.net