Temperaturat e larta në Kosovë, IKSHPK del me rekomandime për qytetarët

Instituti Kombëtar i Shëndetësisë Publike të Kosovës (IKSHPK) ka dalë me një sërë këshillash për qytetarët, duke u bërë thirrje të tregojnë kujdes gjatë ditëve me temperatura të larta dhe ekspozim të shtuar ndaj rrezatimit ultraviolet, transmeton Gazeta Metro.

Instituti rekomandon që gjatë pjesës më të nxehtë të ditës të reduktohet qëndrimi në ambiente të hapura dhe të shmanget ekspozimi i drejtpërdrejtë në diell, veçanërisht rreth mesditës.

Për mbrojtje shtesë, qytetarëve u sugjerohet të përdorin mjete që kufizojnë ndikimin e rrezeve të diellit, përfshirë kapelat, syzet e diellit dhe kremrat me faktor mbrojtës të përshtatshëm ndaj rrezatimit UV.

IKSHPK theksoi edhe hidratimin. Qytetarët këshillohen të konsumojnë rregullisht ujë dhe të mos qëndrojnë për kohë të gjatë pa ushqim.

Instituti u ka bërë thirrje qytetarëve që t’i ndjekin këto masa gjatë periudhave të vapës, me qëllim shmangien e problemeve që mund të shkaktohen nga temperaturat e larta dhe ekspozimi i tepërt ndaj diellit./gazetametro.net