Thaçi i bindur: Vetëm serbët nuk e votojnë ushtrinë, pakicat tjera janë pro

Presidenti Hashim Thaçi është shprehur i bindur se ka votat e komuniteteve tjera, përveç serbëve, për të kaluar projektligjin që FSK’së ia ndërron mandatin nga civil në ushtarak.

Ai këtë e ka konfirmuar në llogarinë e tij  në Twitter, me ç’rast ka falenderuar komunitetet joshumicë për përkrahje, shkruan gazetametro.net.

“Deputetët dhe përfaqësuesit të komunitetit turk, boshnjak, romë, ashkali, egjiptianë dhe malazezë, të gjithë mbështetin ligjin për FSK-në. Faleminderit!”, ka shkruar Thaçi në Tëitter.

Ndërkaq, sot përmes një komunikate Slobodan Vujicic, lider i malazezëve të Kosovës, ka mbështetur transformimin e FSK’së në ushtri. Ky komunitet ka bërë publike përkrahjen e tyre për themelimin e Ushtrisë së Kosovës, duke vlerësuar se një gjë e tillë është në të mirën e paqes në Ballkan.

Ndërkohë, Thaçi para disa ditësh ka premtuar se në rast se ky projektligj shkon në Kuvend dhe nuk kalon, ai do të jepte dorëheqje.

Ndryshe, tani projektligji që shndërron FSK’në në ushtri është dërguar në Qeveri për mendim, dhe i njëjti pritet të procedohet në Kuvend./gazetametro.net