Tragjedi në Shqipëri: Vritet një polic gjatë detyrës, plagoset një tjetër

Një operacion policor në zonën e Lozhanit, në Maliq të Shqipërisë, është shoqëruar me pasoja tragjike, pasi një punonjës policie është vrarë, ndërsa një koleg i tij ka mbetur i plagosur, përcjell Gazeta Metro.

Sipas raportimeve të A2cnn, forcat e rendit kishin ndërmarrë një aksion për lokalizimin e një personi të shpallur në kërkim prej kohësh. Gjatë ndërhyrjes, i dyshuari ka qëlluar me armë në drejtim të efektivëve, duke shkaktuar viktimën dhe të plagosurin.

Burime hetimore identifikojnë autorin e dyshuar si Violand Bacellari, një ish-ushtarak i njohur për organet ligjzbatuese. Pas incidentit, ai është neutralizuar dhe arrestuar në gjendje të plagosur.

Në vendngjarje ndodhen grupet hetuese dhe drejtues të Policisë së Shtetit, ndërsa pritet një reagim zyrtar me më shumë detaje mbi ngjarjen./gazetametro.net