Trump pajtohet për armëpushim dyjavor me Iranin, kusht rihapja e Ngushticës së Hormuzit

Presidenti i SHBA’së Donald Trump njoftoi se ka rënë dakord për një armëpushim dy-javor me Iran, vetëm pak orë para një afati të vendosur për sulme çrrënjosëse ndaj teokracisë islamiste të Iranit, transmeton Gazeta Metro.

Marrëveshja erdhi pas një serie kontaktesh diplomatike intensive dhe synon të krijojë hapësirë për negociata drejt një zgjidhjeje më të qëndrueshme në rajon.

Sipas Trump, armëpushimi është i kushtëzuar me rihapjen e menjëhershme të Ngushticës së Hormuzit, një rrugë kyçe për transportin global të energjisë dhe naftës.

“Në varësi të pajtimit të Republikës Islamike të Iranit për hapjen e plotë, të menjëhershme dhe të sigurt të Ngushticës së Hormuzit, unë bie dakord të pezulloj bombardimet dhe sulmin ndaj Iranit për një periudhë prej dy javësh. Ky do të jetë një armëpushim i dyanshëm,” deklaroi ai.

Trump theksoi se vendimi për të ndalur përkohësisht operacionet ushtarake erdhi pasi, sipas tij, objektivat kryesore tashmë janë arritur.

“Arsyeja për ta bërë këtë është se ne tashmë kemi përmbushur dhe tejkaluar të gjitha objektivat ushtarake dhe jemi shumë përpara me një marrëveshje përfundimtare në lidhje me paqen afatgjatë me Iranin dhe paqen në Lindjen e Mesme,” shkroi ai.

Ai shtoi gjithashtu se pala amerikane ka marrë një propozim me 10 pika nga Irani, i cili mund të shërbejë si bazë për marrëveshjen përfundimtare.
“Pothuajse të gjitha pikat e ndryshme të mosmarrëveshjeve të së kaluarës janë rënë dakord midis Shteteve të Bashkuara dhe Iranit, por një periudhë dy javore do të lejojë që marrëveshja të finalizohet dhe përmbyllet,” deklaroi Trump, duke e cilësuar si një hap të rëndësishëm drejt zgjidhjes së një konflikti afatgjatë./gazetametro.net