Loading…

Trump, urdhër ekzekutiv për blerjen e ilaçeve nga firmat amerikane

  • 06/08/2020 | 23:21

Trump, urdhër ekzekutiv për blerjen e ilaçeve nga firmat amerikane

Presidenti amerikan Donald Trump pritet të nënshkruajë një urdhër ekzekutiv të enjten që kërkon nga qeveria që ajo të blejë ilaçe “thelbësore” nga firmat amerikane e jo nga prodhuesit e huaj, njoftoi këshilltari i Shtëpisë së Bardhë për çështjet tregtare, Peter Navarro.


“Nëse ne kemi mësuar ndonjë gjë nga pandemia e virusit të Kinës,” u tha Navarro gazetarëve të enjten, “është se ne jemi shumë të varur nga vendet e huaja për ilaçet tona thelbësore, për furnizimet mjekësore si maskat, dorezat, syzet dhe pajisjet mjekësore si respiratorët”.

Ai tha se Presidenti Trump do të nënshkruante urdhrin gjatë një vizitë në një fabrikë në Ohajo, një shtet i rëndësishëm në garën e tij për një mandat të dytë në zgjedhjet e 3 nëntorit kundër ish-nënpresidentit Joe Biden.

Presidenti Trump fitoi shtetin e Ohajos me një avantazh prej 8 pikësh në zgjedhjet e vitit 2016, por sondazhet tregojnë për një garë të ngushtë me ish nënpresidentin Biden.

Zoti Navarro tha se urdhri ekzekutiv do të kërkonte nga qeveria amerikane që të krijonte një listë të ilaçeve thelbësore dhe t’i blente ato nga kompanitë amerikane në vend të atyre të huaja, ose atyre nga Kina.

Ai tha se amerikanët “duhet të kenë qasje në ilaçet për shpëtimin e jetës, veçanërisht kur ne po luftojmë këtë betejë kundër armikut të padukshëm nga Kina.” Në fillim të shpërthimit të koronavirusit, Administrata amerikane e Ushqimit dhe Ilaçeve paralajmëroi konsumatorët amerikanë se mund të ketë ndërprerje të furnizimeve mjekësore, përfshirë mungesa të ilaçeve pa recetë.

Navarro tha se urdhri “vendos rregullin për të blerë produkte amerikane për agjencitë tona qeveritare, heq pengesat rregullatore për prodhimet farmaceutike vendase”, dhe gjithashtu mund të nxisë teknologjitë e prodhimit të nevojshme për uljen e çmimeve të ilaçeve.

Presidenti Trump muajin e kaluar njoftoi një marrëveshje prej 765 milionë dollarësh me kompaninë Kodak për të prodhuar përbërës të nevojshëm për prodhimin e ilaçeve të përgjithshme, të cilat tani shpesh blihen nga kompani të huaja.

Më të fundit
Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë