Vdes ish-futbollisti i njohur i Vëllaznimit, Fahredin ‘Dush’ Mati

Futbolli gjakovar është në zi pas ndarjes nga jeta të Fahredin “Dush” Matit, një prej emrave më të spikatur që ka lënë gjurmë në historinë e KF Vëllaznimit, transmeton Gazeta Metro.

Lajmin e ka bërë të ditur vetë klubi përmes një telegrami ngushëllimi, ku ka shprehur respektin për ish-sulmuesin, i cili për më shumë se një dekadë ishte pjesë e skuadrës kuqezi.

Mati mbrojti ngjyrat e Vëllaznimit nga viti 1955 deri më 1968, duke luajtur si qendërsulmues dhe duke dhënë një kontribut të rëndësishëm në rrugëtimin e klubit.

Nga Vëllaznimi u bë e ditur se lidhja e tij me klubin nuk përfundoi me mbylljen e karrierës sportive, pasi ai vazhdoi ta mbështeste ekipin me përkushtim dhe pasion deri në fund të jetës.

“Kontributi, përkushtimi dhe dashuria e tij për KF Vëllaznimin do të mbeten përgjithmonë pjesë e historisë sonë”, thuhet në reagimin e klubit./gazetametro.net