Veriorët i quajnë të ligjshme strukturat paralele

Anëtarë të organeve paralele në veri të cilët njëkohësisht punojnë edhe me sistemin e Kosovës, kanë mohuar të jenë bërë pengesë në punën e kryetarëve të dalë nga zgjedhjet e vitit 2013.

Zoran Todiq, është njëri prej atyre që mban dy “kapela”. Ai është kryesues i Kuvendit komunal të Leposaviqit, njëkohësisht anëtar i të ashtuquajturit organ i përkohshëm i Serbisë në këtë komunë. Këta dualizma janë bërë sebep që legalët dhe ilegalët të përplasen mes vete, ku së fundi ka edhe një iniciativë për shkarkimin e kryetarit të Leposaviqit, me akuzën se ai po punon kundër interesave të serbëve dhe të Serbisë në Kosovë, shkruan Koha Ditore.

Ministria e Administrimit të Pushtetit Lokal (MAPL) ka pranuar shkresën e Kuvendit komunal të Leposaviqit, ku kërkohet inicimi i shkarkimit të kryetarit Dragan Jablanoviq. Por, MAPL-i nuk ka treguar se çfarë veprimesh do të ndërmarrë. Është vetë kreu i kësaj Ministrie, Ljubomir Mariq, i cili bashkë me kryetarët e komunave veriorëve dhe përfaqësuesit e organeve të përkohshme kanë akuzuar Jablanoviqin për tradhti ndaj serbëve, duke bashkëpunuar me Prishtinën zyrtare. Pas kërkesës së gazetës drejtuar Ministrisë së Pushtetit Lokal, kjo e fundit vetëm ka konfirmuar se është e njoftuar lidhur me situatën në Komunën e Leposaviqit.