Veteranët e UÇK’së mbështesin Lladrovcin për kryetar të Drenasit

Kryetari i Partisë Demokratike të Kosovës, Kadri Veseli është takuar me veteranë të Ushtrisë Çlirimtare të Kosovës në Drenas, pak ditë përpara zgjedhjeve të jashtëzakonshme komunale.

Kryeparlamentari ishte i shoqëruar nga kandidati i PDK-së për kryetar të komunës, Ramiz Lladrovci, në zgjedhjet lokale që do të mbahen në Drenas më 4 dhjetor.

Në tubim mori pjesë edhe Naim Bazaj i cili kishte kandiduar për kryetar të komunës si kandidat i pavarur, por ishte tërhequr për ta përkrahur kandidatin e PDK-së.

Më poshtë mund ta lexoni të plotë publikimin e kryetarit të Kuvendit në rrjetin social facebook:

“Gjithmonë jam ndjerë krenar në mesin e familjes sime, me ushtarët e Ushtrisë Çlirimtare të Kosovës. Ashtu u ndjeva edhe sot në mesin e qindra bashkëluftëtarëve, por për përkrahjen e madhe për PDK-në. Veteranët kanë dhënë shumë për Drenasin, për Kosovën. Dhanë gjymtyrë e morën plumba, që ta kemi shtetin tonë të pavarur të mbështetur në parimet e demokracisë.

Sonte përkrahje të madhe i dhanë edhe Ramizit për kryetar të Drenasit.

Përherë do të jemi bashkë, jo vetëm për Drenasin, por për tërë vendin, deri sa ta zhvillojmë ekonomikisht dhe t’iu sigurojmë perspektivë të sigurt të rinjve tanë. KV”. /gazetametro.net