Veseli: Reçaku kapërceu kufijtë e shteteve

Kryeparlamentari i Kuvendit të Kosovës, Kadri Veseli, ka kujtuar simbolikën e muajit janar, duke thënë se ky muaj është i sakrificave për popullin tonë, si dhe duke shtuar se e vërteta e masakrës së Reçakut kapërceu kufijtë.

“Janari ka një simbolikë të jashtëzakonshme në historinë e popullit tonë. Është muaji i sakrificave të mëdha, i rënieve të mëdha. Është muaji i krenarisë dhe lavdisë për popullin tonë. Është edhe muaji i Reçakut, fshatit martir që u bë simbol i sakrificës dhe rezistencës kosovare në sytë e gjithë njerëzimit”, shkroi ai në rrjetin social Facebook, transmeton gazetametro.net.

“E vërteta e Reçakut kapërceu kufijtë e shteteve, kapërceu kontinentet dhe preku ndërgjegjen e njerëzimit. Kështu, një fshat i vogël u kthye në pikë kthese për historinë e Kosovës dhe atë botërore. Në Reçak, nisi fillimi i fundit të Serbisë në Kosovë”, ka thënë Veseli. /gazetametro.net.