Veseli tani po merr frymë lirshëm

Kadri Veseli ka fituar sfidën e parë zgjedhore si kryetar i Partisë Demokratike të Kosovës, edhe pse me shumë vështirësi dhe angazhim me të gjitha forcat.

Zgjedhjet e jashtëzakonshme për kryetar të Drenasit, ishin sfida e parë zgjedhore e Veselit si kryetar i PDK’së, dhe humbja eventuale e tij në këtë komunë, bastion të PDK’së, do të nënkuptohej se ai nuk po mundej të përmbushte zbraztirën e lënë nga Hashim Thaçi pas largimit nga kreu i partisë.

Edhe pse jo në raundin e parë, siç fitohej Drenasi zakonisht nga PDK, tani Veseli mund të merr frymë lirshëm, dhe të vazhdojë konsolidimin e partisë, për t’u bërë gati për sfidat zgjedhore të radhës, që pritet të jenë jo më larg se vitin e ardhshëm.

“Qytetarët, me vullnetin e tyre të lirë dhe në një proces të shembullort zgjedhor, treguan se Drenica dhe PDK janë një lidhje e pashkëputshme. Falemnderit nga zemra. Ramizit, punë të mbarë si Kryetar i ri i Drenasit. Festë është për të gjithë”, ka shkruar Veseli në Facebook, pas konfirmimit se zgjedhjet në Drenas janë fituar nga kandidati i tij,, Ramiz Lladrovci. /gazetametro.net