Vetëvendosje insiston që të ndërpriten hetimet  

Hetimet për vdekjen e Astrit Deharit në burgun e Prizrenit po vazhdojnë të mos jenë të besueshme nga Lëvizja Vetëvendosje. Përmes një konference për media, deputetja e kësaj lëvizje Albulena Haxhiu, ngriti dyshimet se Prokuroria dhe Policia e Kosovës janë duke ndërtuar rastin siç ata po duan.

Për herë të dytë kjo lëvizje po kërkon që të ndrëpriten hetimet e rastit të Astritit, pasi që ato sipas VV-së, janë duke u administruar në mënyrën më të keqe të mundshme.

“Mbrëmë hetuesia ka vendosur që xhirimet e burgut të publikohen në media. Pse ka nevojë hetuesia dhe prokuroria të bëjnë propagandë në media. Publikimi i gjurmëve flet zëshëm për rast të qëllimshëm”, tha Haxhiu në këtë konferencë.

Për Vetëvendosjen e cila edhe sot kërkoi ndërprerjen e hetimeve është e papranueshme që ato të kryhen nga ‘policia e Nexhmi Krasniqit’ e institucionet e tjera ‘të prontos’ siç i quajtën ata.

“Për shkak se këta njerëz që merren me hetime janë të përfshirë në skandale, ne kemi kërkuar që hetimet për rastin të ndërpriten. Deri më tani nuk kemi marrë asnjë përgjigje nga institucionet e Kosovës për kërkesën tonë dhe të familjes”, tha Haxhiu./gazetametro.net