Vetëvendosje: Jemi gati për ta qeverisur Kosovën

Foto:Ilustrim

Në tubimin elektoral të Shtimes, nënkryetari i VV-së dhe kandidati për deputet, ka thënë se VV është e gatshme që të vendosin vijë të kuqe krimit dhe korrupsionit dhe të gatshëm për ndryshimin.

---

“Shteti zhvillimor, prej një tregtie që tregton mallra të huaj, në një ekonomi që prodhon dhe punëson, eksporton, rivitalizon Trepçën dhe bën KEK-un ndërmarrje të suksesshme. Pra prej një ekonomie për pushtetarë në një ekonomi për qytetarë”, ka qenë zotimi i Sejdiut në lidhje me ekonominë në tubimin e mbajtur në Shtime, përcjell zyra për informim e kësaj partie.

Kryetari i Prishtinës dhe kandidati për deputet, Shpend Ahmeti, në tubimin elektoral të Shtimes, ka thënë se përkrahja nga populli ka ardhur si rezultat i asaj që VV në vazhdimësi e ka dashur popullin.

“Na e kemi dashtë e duam dhe do ta duam popullin se jemi vetë qytetarë të kësaj Republike”, ka thënë Ahmeti në Shtime.

Ahmeti ka thënë se shumë mërgimtarë i kanë shkruar nga diaspora, të cilët i kanë thënë se po nisen drejt Kosovës për të përkrahur VV-në.

Kandidati për deputet, Faton Topalli, ka thënë aty se ndihet i nderuar që është pjesë e listës së VV-së.

“Të dashur mërgimtarë që keni kontribuar që jepni për ne dhe Kosovën më shumë se të gjitha rrogat dhe pensionet që jep shteti i Kosovës ju premtojmë se nuk do të paguani më doganë taksën e gjelbër. Qeveritarët nuk ju deshën, por qytetarët e Kosovës ju duan shumë, ju duan me zemër”, tha ai në tubimin e sotëm.

Topalli iu ka bërë thirrje votuesve të partive të tjera që janë të pakënaqur me qeveritë e pasluftës që të bashkohen me VV-në, teksa ka shtuar se qeverisja e VV-së do të jetë qeverisje e të gjithë qytetarëve pa dallime partiake.

Kandidatja për deputete, Nazlie Bala, ka thënë se me qeverisjen e VV-së, ata që kanë vjedhur shtetin do të përfundojnë në burg.

“Me Vetëvendosje synojmë shtet pa korrupsion, shtet pa kriminelë. Kosova nuk i takon asnjë klani, por është e të gjithë qytetarëve pa dallim”, ka thënë Nazlie Bala në këtë tubim, në ditën e fundit të fushatës zgjedhore për zgjedhjet e 11 qershorit.

Kandidatja për deputete, Shqipe Pantina, iu ka bërë thirrje qytetarëve të Shtimes të mbështesin VV-në dhe Albin Kurtin si kryeministër.

Pantina ka thënë se VV e ka programin më të mirë, i cili mund ta nxjerrë vendin nga gjendja ku është katandisur.

“Ne besimin tuaj do ta kthejmë në veprim”, iu ka premtuar Pantina qytetarëve të Shtimes.