Vetëvendosje me pano në Kuvend, Gaxherri – Haxhiut ‘mshele’

Në debatin që është zhvilluar në Kuvendin e Kosovës, i cili ka vazhduar të enjten deri në ora 20:30, për arrestimin e aktivistëve të Vetëvendosjes, deri sa mbante fjalën Albulena Haxhiu, dy deputetë të LVV-së, Driton Çaushi e Fisnik Ismaili, mbajtën një pano para deputeteve me fotografi të zyrtarëve të lartë të institucioneve të Kosovës.

Në pano përfshiheshin ministren e Drejtësisë, Dhurata Hoxha, ministri i MPB-së, Skënder Hyseni, drejtori i Policisë, Shpend Maxhuni, drejtori i RTK-së, Mentor Shala, Ridvan Berisha, ish prokurori Syle Hoxha, e të tjerë.

Ndërsa gjatë debatit, deputetja e LDK-së, Besa Gaxheri, iu drejtua deputetes Albulena Haxhiut, me fjalët “mshele mori mo. Nuk ka gjë më e ulët për mua se me u marrë me ju deputete”.

Ky debat u nxit derisa Haxhiu ndërhyri në fjalën e Gaxherrit, e cila e akuzoi LVV-në se ajo është për të hedhur gaz dhe për t’i dëmtuar institucionet e Kosovës dhe po ashtu kërkoi të di cili është qëllimi i këtij debate, raporton KosovaPress.