Një grua 40 vjeçe bashkë me vajzën e saj 9 vjeçe u vra mbrëmë nga burri i saj në Brekoc të Gjakovës. Ajo kishte njoftuar policinë për kërcënimin që i kishte ardhur paraprakisht, por policia nuk ka qenë në gjendje që t’i dalë në mbrojtje.
Pak orë para se dorasi të qëllonte me automatik gruan dhe vajzën e tij i kishte dërguar një mesazh kërcënues në telefon asaj mëson Kallxo.com. Kjo e fundit pak orë para vrasjes ishte ankuar në polici për kërcënimin.
Detajet për këtë janë konfirmuar nga kryeprokurori i Gjakovës Ali Selimaj. “Viktima është ankuar në polici për kërcënimin policia ka shkuar në shtëpinë e të dyshuarit dhe ka tentuar ta kontaktoj por ka qenë e pamundur” ka thënë Selimaj.
Ai ka shtuar se dorasi është person i njohur për prokurorinë dhe ishte i njohur pasi ndaj tij ka një procedurë penale.
Policia e ka pranuar se dorasi kishte qenë në paraburgim për dhunë ndaj bashkëshortes së tij, por ka përgënjeshtruar lajmin se ai ishte liruar vetëm një ditë më parë nga paraburgimi.
Në një bisedë për ‘Kallxo’, Selimaj ka konfirmuar se i dyshuari ishte në paraburgim nga data 12 maj deri në 6 qershor të këtij viti dhe ndaj tij ka një aktakuzë për dhunë në familje e cila është dorëzuar në gjykatë.
Në rrethana ende të pasqaruar një 40 vjeçare dhe vajza e saj u qëlluan për vdekje mbrëmjen e datës 7 gusht. Dorasi dyshohet të jetë bashkëshorti i 40 vjeçares. Qifti jetonin të ndarë prej disa muajsh dhe kishin pesë fëmijë dy prej të cilëve jetonin me të atin dhe tre me nënën.
Viktima është me prejardhje nga Tropoja ndërsa jetonte nga paslufta me familjen e saj në Gjakovë.