Loading…

Vizito shtëpinë e Kadaresë

  • 04/02/2021 | 12:24

Vizito shtëpinë e Kadaresë

Tashmë të gjithë mund të vizitojnë shtëpinë ku lindi, u rrit dhe hodhi në letër krijimet e para shkrimtari i njohur shqiptar Ismail Kadare. Teknologjia bën të mundur një vizitë të plotë në ambientet e shtëpisë në Gjirokastër.


Kujtojmë se vetëm pak ditë më parë gjeniu i letrave shqip festoi 85-vjetorin e lindjes tij.

Muzeu “Shtëpia Kadare” është restauruar se fundmi ku është përmbajtur plotësisht projekti fillestar i ndërtesës që përbëhet nga dy kate, nga qilari që ndodhet në katin përdhes ku mbaheshin zahiret (rezerva ushqimore) të dimrit. Ky kat shërbeu edhe si vendstrehim gjatë bombardimeve në Luftën e Dytë Botërore. Në themelet e shtëpisë ndodhet sterna e ujit që grumbullon ujin e shiut nga hulluqet e çatisë dhe është origjinale. Në katin e parë (nëndivani) janë hajatet që përdoreshin për kafshët dhe veglat e punës.

Në katin e dytë ndodhen ambientet e banueshme të shtëpisë. Dy oda të mëdha ku qëndronin miqtë dhe dy oda të vogla “dimërore” që përdoreshin nga familja. Brenda shtëpisë gjenden disa sende origjinale të familjes si mangall, sënduk, një helmetë e Luftës së Vietnamit ku Ismail Kadare ka qenë reporter. “Shtëpia Kadare” është bërë e njohur për vizitorët falë romanit “Kronikë në gur” ku shkrimtari përshkruan çdo detaj të saj.

Muzeu hapi dyert për vizitorët për herë të parë më 28 janar të vitit 2016. Shtëpia daton në vitin 1799 dhe u rindërtua pas djegies aksidentale në vitin 1999, sipas përshkrimit që i bën vetë Kadare. Projekti i rindërtimit u mundësua me fondet e UNESCO’S dhe qeverisë shqiptare. Banesa ndodhet brenda qendrës historike në lagjen “Palorto”. Ka statusin monument kulture i kategorisë së parë, shërben edhe si qendër kulturore ku zhvillohen aktivitete të shumta.

Për të vizituar linkun mund të klikoni këtu: https://my.matterport.com/show/?m=gHL5QgQabAa&back=1 /DiasporaShqiptare / GazetaMetro

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë