Loading…

Zëvendësministri Krasniqi: Buxheti për rimëkëmbjen ekonomike gati është harxhuar

  • 29/09/2020 | 19:18

Zëvendësministri Krasniqi: Buxheti për rimëkëmbjen ekonomike gati është harxhuar

Zëvendësministri i Financave, Agim Krasniqi, ka bërë thirrje që të kalojë projektligji për Rimëkëmbjen Ekonomike. Ai ka thënë se buxheti për rimëkëmbjen ekonomike gati është shpenzuar dhe se duhet kaluar në Kuvend projektligji për të hapur mundësi për fonde shtesë.

“Kur e shikon pakon e Rimëkëmbjes Ekonomike prej 365 milionë. Janë harxhuar 136-137 milionë euro tashmë vetën për pakon emergjente dhe ende nuk ka përfunduar, ende është pjesa e ankesave. Janë ndarë 5 milionë euro për arsimin, për të krijuar mundësi për fillim të vitit shkollor. Janë ndarë dhjetë milionë euro për komunat për të rimbursuar shpenzimet që kanë pasur. E po ashtu këto 87 milionë euro dje për këtë program të rimëkëmbjes ekonomike. Krejt çka ka qenë e mundur të bëhet është bërë tashme, duke mos rrezikuar bilancin bankar e parametrat. Mund të themi se kemi shfrytëzuar gjitha mundësitë për të ndihmuar sektorin privat, bile kemi hyrë pak në bilanc bankar, me supozim se 50 milionë eurot e sivjetme nga Komisioni Evropian janë të sigurta”, ka thënë Krasniqi për emisionin “Express” në KTV. “Gjitha fondet e parapara për programin e rimëkëmbjes janë shpenzuar”.

Krasniqi ka thënë se humbjet në ekonomi si pasojë e pandemisë janë më të mëdha se që ishte menduar fillimisht.

“Kemi rreth 300 milionë euro më pak të hyra tash, kemi edhe tre muaj”, ka shtuar ai.

Ai ka shtuar se duhet bërë ndryshime ligjore për të pasur çasje në fondet shtesë dhe kjo është e mundur vetëm me miratimin e Projektligjit për Pakon Emergjente.

“Të aprovohet ai ligj, pasi mundëson thithjen e mjeteve që nevojiten për programin e rimëkëmbjes ekonomike, e mundëson edhe pjesën e Trustit”, ka shtuar Krasniqi, duke thënë se me projektligjin do të ngadalësohej rënia ekonomike.

Ai ka thënë se është mirë të kalohet ligji në lexim të parë, e më pas të ulen grupet parlamentare e të flitet për amandamentime të mundshme. Sa i përket tërheqjes së 10 për qind të mjeteve nga Trusti, Krasniqi ka thënë se fillimisht ishte shqyrtuar të rimbursoheshin ato, por është parë se krijon pabarazi më të madhe.

“Nuk na ka pëlqyer kjo ide dhe është larguar kjo pjesa e rimbursimit të mjeteve. Janë dy arsye bazë, e para pabarazia që vendoset te kontribuuesit e trustit. Unë mund të kem mundësi të tërheqi 100 euro e të rimbursohem vetëm aq. E tjetri 5000 euro. E më pas të rimbursohet po aq me taksa tona të përbashkëta, përfshirë edhe atij që ka në Trust vetëm 100 euro. Krijohet pabarazi e dyfishtë”, ka shtuar Krasniqi.
Ai ka shtuar edhe se duhet rishikuar mundësia e rritjes së të hyrave për skemat sociale e pensionale.

Po ashtu Krasniqi ka folur edhe për mundësinë e ndikimit në rast të një mbyllje të re të vendit në dimër shkaku i pandemisë.

“Këto shtesat që po jepen për sektorët e shëndetësisë, policisë, shtesa tjera që po ndodhin. Po e rrisin faturën e pagave, faturën e shpenzimeve rrjedhëse. Kemi planifikuar që një pjesë të madhe të kësaj fature ta rregullojmë me rregullimet që i jep ligji në tremujorëshin e fundit. Po shpresoj të mos ketë mbyllje, e krejt po deklarojnë ashtu. Nëse ka, duhet rishikuar komplet të gjitha elementet buxhetore, në mënyrë që të sigurojmë fonde ekstra. Ajo është skenar që na vendos prapë të rishikojmë punën e deficitit e bilancit bankar e rritjes kufirit të huamarrjes. Duhet kuptuar ne huamarrjen e kemi të kufizuar, sado që na presim fondet te dera, ne nuk guxojmë me hy më shumë në borxh publik sesa që e kemi me ligj. Duhet të kemi kujdes. Duhet të kemi kujdes të flasim për numra real, numra dhe me gjendjen që e kemi. Nuk mund të projektojmë diçka që është mbi mundësitë e mbi legjislacionin aktual që e kemi. Ne gjithherë kujdesemi të ruajmë stabilitetin. Kur flasim , nëse përkeqësohet situata, duhet ta kuptojmë të gjithë, duhet shikuar gjitha pozicionet edhe në sektorin publik. Po e them të gjitha për arsye se do mund të vijë momenti të rishikohen pagat. Jo se e jemi në atë pikë. Por përkeqësimi, mbyllja edhe njëherë për shkak pandemisë, duhet shikuar çdo gjë”, ka thënë Krasniqi.

Më të fundit
Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë